Frídagurinn í Herceg Novi

Að kvöldi frídagsins eru allir sælir eftir skemmtilegan dag í Herceg Novi. Í stað þess að eyða deginum í rútuferðum þá var ákveðið að skoða bæinn sem við erum í enda fæst krakkana haft tækifæri til þess að skoða sig um. Margir sváfu aðeins frameftir en þeir sem voru sprækastir þeir Stefán og Friðrik Þjálfi voru komnir út um kl. 9 og farnir í körfubolta. Við hin sem vorum aðeins seinni í gang fórum á ströndina um kl. 11. Þar var yndislegt enda sól og afskaplega heitt. Þó gustaði svolítið á okkur en hverju erum við íslendingarnir ekki vanir? Við Þorsteinn sinntum foreldrahlutverkinu og tókum myndir af stelpunum sem skelltu sér í sjóinn og tóku Hallgerður og Tinna þetta með stæl þegar þær skelltu sér á bólakaf meðan Geirþrúður dýfði tánum ofan í og Jóhanna hvatti þær áfram. Fljótlega fór að bera á sundgörpum í flæðamálinu og virtust þeir tala íslenkst mál. Við nánari athugun reyndust þetta vera feðgarnir Friðgeir og Dagur Andri sem syntu þarna um eins og þeir hefðu aldrei gert neitt annað en að synda í söltum sjó!

 

 

 

 

 

 

Ekki höfðum við eirð í okkur til að liggja þarna til eilífðarnóns svo við skelltum okkur í göngu. Ég fór ásamt Jóhönnu og Geirþrúði í átt að gamla bænum meðan þau hin fóru heim í saltskolun og ætlunin var að hittast við kirkjuna sem ég hafði verið gerð brottræk úr. Eftir að við höfðum gengið kröftuglega um allar 600 tröppurnar sem virtust endalausar upp að virkinu fórum við skoðunarferð þar um. Stórkostlegt útsýni yfir bæinn og langt út á Adríahafið og inn víkina. Þegar garnirnar voru farnar að gaula svo hátt að kirkjuvörðurinn í kirkjunni góðu var orðin hræddur um að víkingastelpan frá Íslandi væri farin að nálgast, var augljóslega komin tími á pizzu! Eins og áætlað hafði verið hittist hópurinn við kirkjuna góðu enda fjöldi af kaffihúsum og pizzeríum allt í kring. Við það tækifæri rákum við inn nefið í kirkjuna og vogaði ég mér ekki lengra en í hurðagættina og það fyrsta sem ég sá voru gyllt hlið sem nú var búið að setja upp við þau þrjú hurðargöt sem ég hafði gægst inn um (þó aðeins eitt þeirra) daginn áður. Sum sé í gær var ekkert sem benti til nokkurs annars en þetta væri opið en í dag er þetta augljóst bannsvæði.  Ég er þó alveg viss um að mér hafi verið fyrirgefið þótt kirkjuvörðurinn hafi ekki gert það .

En hungrið leiddi okkur að huggulegum pizzustað þar sem sólin skein og notalegt var að setjast niður. Fljótlega fóru hinir íslensku víkingar að týnast að staðnum.  Góð pizza og enn betra gos rann vel niður í svanga kroppana og eftir það langaði alla í þetta kalda sem er með mismunandi bragði og alltaf gott. Ákveðið var að kíkja á slíkar gæðasjoppur við strandgötuna enda skipta þær hundruðum ísbúðirnar við sjóinn! Eitthvað tvístraðist hópurinn upp þar sem sumir vildu sparka bolta, aðrir skoða í búðir og enn aðrir bara rölta um og skoða minjarnar. En ísinn var góður. Svo góður að ég þurfti virkilega að hemja mig til þess að kaupa ekki meira í næstu og þarnæstu ísbúð. Við stelpurnar, Jóhanna, Geirþrúður og Tinna og ég komum heim um kl. 18 og hittum fyrir nokkra úr hópnum sem þá höfðu verið að sparka bolta og rölta um.  Samkvæmt skrefateljaranum í gemsanum mínum gekk ég 5876 skref í dag og er það ekki alveg nákvæmt því hann var í töskunni og því ekki alveg jafn næmur fyrir skrefunum sem ég tók. Hefði reyndar verið geðveikt gaman að telja tröppurnar en þær eru amk tvær grilljónir  hér í bæ og við gengið svotil helminginn í dag! Og var einhver að segja að þrepin upp að Akureyrarkirkju væru mörg - ég meina komm on!

Krakkarnir voru ekki lengi að raða sér upp við borðstofuborðið okkar og fara í tvískák með tilheyrandi stuði en eftir kvöldmatinn var komin tími á hópefli. Jebb rétt til getið Hópefli! Að þessu sinni var keppt í þekkingu. Þar sem við höfum eyjapeyja í hópnum sem er þekktur fyrir ýmislegt annað en skák, nefnilega að semja spurningar fyrir Gettu Betur, var tilvalið að setja upp spurningakeppni í anda þeirrar góðu keppni og var unglingalandsliðinu okkar skipt upp í tvo hópa. Stelpur gegn strákum. Hallgerður hafði haft uppi miklar yfirlýsingar um það hvernig stelpurnar myndu rústa strákunum en í raun og veru var það fararstjórinn sem rústaði landsliðinu því ég vissi miklu fleiri svör en bæði liðin til samans. Það er ekki vegna þess að ég sé eldri, ljóshærð eða bara eiturklár heldur vegna þess að þau vissu ekki svörin við spurningum eins og hvað heitir flugvélin hans Ómars Ragnarssonar. Mjörg stór spurningamerki og heyrðist jafnvel: Hver er Ómar Ragnarsson.....  En fleiri skemmtilegar spurningar komu fram og keppt var í fimm flokkum: Saga, Dægurmál, Ýmislegt, Skák og íþróttir. Liðin skiptust á að svara og höfðu til þess 15 sekúndur og svarrétturinn fluttist yfir á hitt liðið ef ekki kom rétt svar. Merkilegt hvað krakkarnir gátu svarað í flokknum skák, þar sem nánast flestar spurningarnar voru eldri en sjálfur fararstjórinn. En hvorugt liðið vissi hvaða tvær íslensku konur hefðu orðið ungfrú heimur á síðustu öld. Þó var ein spurning í skákflokknum sem hvorugt liðið gat svarað en sjálfur fararstjórinn svaraði af miklu öryggi. Spurt var hvar fyrsta óformlega heimsmeistaramót í hraðskák hefði verið haldið og hver hefði unnið. Jebb rétt svar var í Herceg Novi og sjálfur Fischerinn vann. Já það getur verið gott að vera gáfuð ljóshærð hjúkka í Svartfjallalandi. Ég fékk reyndar bara tækifæri til að svara eftir að þau voru búin en ég átti í samkeppni við Stefán sem átti mjög erfitt með að halda aftur af sér svörunum . En stemmningin var skemmtileg og unnu stelpurnar með 5 stig gegn 4 stigum strákanna sem voru jú tveimur fleirri í liði. Eftir þetta var haldið áfram að tefla og farið á skikkanlegum tíma í háttinn enda sjötta umferð á morgun (sunnudag).

Í gærkvöldi gengum við eftir ströndinni á veitingastaðinn Konoba Feral. Fengum langbesta matinn í Svartfjallalandi. Matseðillinn var fjölbreyttur og erfitt að gera upp á milli. Aðeins einn ungur piltur í hópnum kaus að borða annars staðar þar sem ekki var pizza í boði á þessum stað svo þeir feðgarnir Stefán og Friðrik skelltu sér á Pizza Pic Nic og snæddu þar. Við áttum frábæra kvöldstund á strandgötunni og fengum okkur já ÍS í einum ísbásnum á leiðinni til baka á hótelið. Veit ekki hvaða fíkniefni eru í þessum ís en óboj hvað hann er góður!

Nú svo er komin tími til að þakka allar þessar frábæru kveðjur sem verið er að senda okkur. Stundum þegar við náum að nettengja okkur á Íslandstorginu við skákhöllina þá lesum við upphátt kveðjurnar og reynum líka að sína krökkunum sérstaklega ef kveðjur eru frá þeirra foreldrum. Endilega haldið áfram að senda kveðjur og hvatningu því ekki veitir af núna á lokasprettinum. Enn eru fjórir vinningar í pottinum og við erum þekkt fyrir að rífa okkur hressilega  upp í lokabaráttunni.

Athugasemdir

[Anna (IP-tala skráð) 21.9.2008 kl. 10:39]

Keep up the good work, dahlings! Við styðjum ykkur alveg 150% héðan úr rokinu og fylgjumst með hverju spori hjá ykkur. Vona að það hafi fundist mannsæmandi bókabúð þar í Herceg Novi enda Geirþrúður skuldbundin að koma heim með Hroka og hleypidóma á serbnesku ef hún finnst.

[Erla Dögg (IP-tala skráð) 21.9.2008 kl. 10:51]

Gott að heyra að það sé góður andi og gott samkomulag í hópnum. Átti reyndar ekki von á öðru, þetta eru yndislegir krakkar. Ég er soldið hneyksluð að þau skuli ekki kannast við frúnna. Ég krossa putta fyrir vinningum. Gangi ykkur vel.

Ps það voru haglél hér í gær á meðan þið voruð í sjónum.

Bestu kveðjur

Erla

[Hulda (IP-tala skráð) 21.9.2008 kl. 11:43]

Hæ öll sömul

það er virkilega gaman að lesa þessa pistla frá þér Edda og ná þannig að fylgjast með ykkur og hvað þið eruð að gera.  Mig langar orðið í ís í hvert skipti sem ég fer inn á síðuna...!

Patrekur það eru allir hér heima að fylgjast með þér, við, pabbi og meira að segja mamma komin með nettengingu og fylgist með.

gangi þér vel Patrekur minn og haltu fókusnum á jákvæða hluti, þetta er frábær reynsla fyrir þig og þú ert frábær 

bestu kveðjur til ykkar allra og gangi ykkur vel með næstu skákir

Hulda

p.s Patrekur hafðu kveikt á símanum þínum, ég hef náð sambandi þar sem kona sagði mér á framandi tungumáli að þú værir með slökkt á símanum þínum

[Elín Friðriksmamma (IP-tala skráð) 21.9.2008 kl. 12:58]

takk fyrir ofboðslega skemmtilega pistla, þið eruð alveg ljósið í tilveru þeirra sem hér kúldrast í haustroki og rigningu, fjárlagagerð ríkisins, sláturgerð og slíkum skemmtilegum íslenskum haustverkum (hm)

Maður situr alveg rangeygur og slefandi í vímu þegar ískaflanir koma.

Nú verður hugurinn hálfur í íþróttahöllinni svartfellsku næstu tímana.

Baráttukveðja frá mömmu, ömmu og langömmu til alls íslenska liðsins.

[Ásta Kristín Svavarsdóttir (IP-tala skráð) 21.9.2008 kl. 17:54]

Erum á leið út í ísbúð eftir lestur pistlanna!! Annars bestu kveðjur til ykkar allra sem gera okkur Íslendinga svo stolt:) Bestu kveðjur fá þó Thorsteinson genin og fyrrverandi Jöklaborgarnemendur knús úr roki hagléli og rigningu og regnbogum;)