Nýjustu fréttir af skákstað!!!

Héðan er það að frétta þegar klukkan er orðin rúmlega sex eru 6 af 9 komnir af skákstað. Hildur Berglind var líklega að tefla á öðru móti en hinir því hún kom út rétt rúmlega hálftíma eftir að skákin hófst. Hraðskákin hennar byrjaði ljómandi vel og hafði hún góða stöðu langt fram í skákina en varð jafnhraðvirk og andstæðingurinn sem tefldi víst líka mjög hratt og lék af sér svo endaði í tapi. Hrund átti góðan dag og vann andstæðing sinn frá Suður Afríku og gleðin leyndi sér ekki í augum hennar þegar hún kom til okkar á tyrkneska Íslandstorgið í bláa sófanum!

Svo komu hin hvert af öðru, Hjörvar þáði jafntefli í hrikalegri stöðu og peði undir. Sjálfur orðaði hann það svo að jafnvel mamma hans hefði séð hversu slæm staðan var!! Jóhanna kom um svipað leyti hún tefldi við rúmlega 1900 stiga stelpu frá Georgíu. Var með góða stöðu framan af en fékk svo á sig fórn sem hún tapaði tveimur peðum á og eftir það var lítið í stöðunni annað en tap. Elsa átti slæman leik mest allann tímann og endaði í tapi. Svanberg kom í sigurvímu inn og nú kominn með 1,5 vinning og því jafn Hjörvari. Hin þrjú eru enn að og síðustu fregnir herma að Hallgerður hafi ágæta stöðu en ekki er vitað um Sverri eða Dag.

Með kveðju frá Íslandstorgi,
Edda

Athugasemdir

[Tómas Rasmus (IP-tala skráð) 20.11.2007 kl. 20:58]

Hæ skákhetjur.

Við erum ákaflega stolt af ykkur öllum þið eruð frábærir fultrúar Íslands.

Það er gaman að frétta að krakkarnir eru allir komnir í góðan gír, Hjörvar, Svanberg, Hallgerður, Jóhanna, Sverrir, Dagur, Hrund, Elsa og Hildur.

En sjálflægar fréttir úr Salaskóla eru þessar: 

Því miður missti Hildur af undanrásunum í bekkjarkeppni yngsta stigs í Salaskóla en það voru 20 lið með rúmlega 60 krökkum að spreyta sig í morgun. Korter fyrir keppni mættu tvo ný stelpulið þannig að umræðan um ykkur hefur sérlega jákvæð áhrif.

Bestu kveðjur úr Kópavoginum.

Tómas Rasmus 

[Hrannar Baldursson, 21.11.2007 kl. 02:04]

Ég tek undir með Tómasi. Þetta er sérlega hvetjandi fyrir önnur skákbörn. Skemmtileg lýsing af Svanbergi. Hildur hefur tekið ótrúlegum framförum síðan hún byrjaði að tefla fyrir tæpum tveimur árum. 

Við fylgjumst vel með að heiman og sendum flest jákvæða strauma. Umfram allt, ekki gleyma að þetta er leikur og hafa gaman af þessu.