Fimmta umferð í gangi

Í dag er án efa langbesta veðrið frá upphafi og frábært að sitja úti í sólinni og horfa út á sjóinn. Það er ekki laust við að maður hafi þó verið með fiðrildi í maganum í morgun því gærdagurinn var ekki mjög gjöfull á vinninga. Lítill tími gafst til undirbúnings fyrir fimmtu umferðina sem hófst kl. 10 en krakkarnir voru þó í þokkalegu formi. Hildur Berglind sem hefur teflt mun betur milli umferða en akkúrat í hverri umferð fékk skottu svo hún er loksins komin með einn vinning. Hún er reyndar staðráðinn í því að vinna seinni umferðina í dag og er búin að gera samning við Alejandro magadansbúningasala um heilt sett ef hún vinnur! Þar sem ég held líka með Hildi hef ég samþykkt að taka þátt í kostnaði af þessum búning sem um ræðir. Hildur er því á leið á æfingu til Palla en ætlar svo að fara í magadanskennslu við sundlaugina kl. 15.30 og hita þannig upp fyrir seinni umferðina sem hefst kl. 17.

Dagur Andri átti góðan morgun og var komin út eftir 1,5 tíma með rosaflotta vinningsskák. Svanberg, Hallgerður og Hrund töpuðu en Jóhanna Björg gerði jafntefli. Hjörvar og Sverrir eru enn að tefla. Elsa er komin út en engin virðist vita hvernig skákin fór hjá henni þar sem hún fór beint til Braga að fara yfir skákina.

Í gærkvöldi kom hópurinn saman og borðuðum við á "Ítalska" staðnum hér í húsinu. Það var ákveðin upplifun því hann er álíka ítalskur og Kebab húsið á Grensásveginum. Allir voru samt kátir og glaðir og maturinn alveg ágætur þótt hann hafi ekki verið sérlega ítalskur. Hins vegar var gott næði og rólegt þar inni sem var hin besta tilbreyting frá skvaldrinu í stóra matsalnum.  Á morgun er frídagur og ætla nú flestir að reyna að slaka á og gera eitthvað skemmtilegt eins og t.d að fara í skoðunarferðir og þess háttar. Kvöldið verður svo að sjálfsögðu nýtt til undirbúnings fyrir 7. umferð.

Með kveðju úr tyrknesku sólinni,
Edda

Athugasemdir

[Amma Kóp (IP-tala skráð) 22.11.2007 kl. 12:29]

Húrra fyrir Hildi Berglindi svo áfram nú! Það má í góðu geta þess að ef þið farið nú fleiri að læra magadans þarna í pásum milli umferða  er einmitt haldið í Kebab húsinu á Grensásveginum á hverju ári austurlensk magadanskvöld þið mætið bara á næsta ári.  En ég sendi  báráttukveðjur til allra íslendinga á mótinu bless, bless

Amma kóp.